Asemblea Nacional de EQUO Galicia (23/01/2016)

[Asemblea en streaming, se non hai atrancos técnicos: https://www.youtube.com/watch?v=Cwfm55zsD04]

 

Esta é a convocatoria para a xuntanza ORDINARIA da Asemblea de EQUO Galicia o sábado 23 de xaneiro:

HORA: 16h – 19h (Estímase unha duración de 3 horas. Prégase puntualidade)
LUGAR: A Nave de Vidán, Avenida Mestra Victoria Miguez, 44.
15706 Santiago de Compostela http://www.anavedevidan.com

ORDE DO DÍA:
  1. Informe e aprobación das contas de 2015
  2. Memoria de actividades de EQUO Galicia e dos territorios
  3. Informes da Mesa Nacional
  4. Posibilidade de que EQUO Galicia se faga socia de Nosa Enerxía Sociedade Cooperativa Galega
  5. Postura ante unha hipotética repetición das eleccións ao Congreso e Senado de España
  6. Postura ante as Eleccións Galegas 2016
    -> Neste punto haberá un traballo previo no obradoiro da mañá, pero loxicamente as decisións correspóndenlle á Asemblea
  7. Planificación de 2016 e estratexia de crecemento
    -> Tamén traballada previamente no obradoiro da mañá

Toda persoa afiliada ou simpatizante de EQUO Galicia está invitada a participar, tanto na Asemblea como na actividade da mañá, que pasamos a describir:

OBRADOIRO DE PLANIFICACIÓN de 2016, no que traballaremos principalmente en dúas sesións temáticas:

  • Traballar unha ou varias propostas para as Galegas de 2016, tanto neste obradoiro como na Asemblea posterior:
    1. Desde a Mesa Nacional presentarase unha proposta para a conformación dunha candidatura verde, desde abaixo e sen dirixismos partidistas.
    2. Proposta alternativa: participar activamente na conformación dunha candidatura de confluencia, con primarias abertas e un programa verde.

      O detalle desta proposta sería:

      – EQUO Galicia traballaría o programa para as eleccións internamente. Dese programa tamén sacariamos uns poucos puntos chave que serían o acordo de mínimos que mostraríamos clara e publicamente en calquera encontro coa prensa, e que esixiriamos a calquera iniciativa de confluencia que vaia xurdindo.

      – EQUO Galicia tería unhas primarias internas.

      – EQUO Galicia estaría a favor de que se presente unha candidatura de confluencia o máis ampla posible (partidos, mareas, independentes, …), baixo as seguintes condicións:
      1. Primarias abertas;
      2. Cumprirse os mínimos verdes decididos no noso programa (estes mínimos tampouco poderían ser moitos e extremadamente ambiciosos, se queremos que a confluencia sexa ampla, con todo sería unha asemblea de EQUO Galicia no segundo trimestre quen aprobaría eses mínimos).

    3. Novas propostas que poidan xurdir no propio obradoiro.

    Debaterase cal pode ser a aposta máis axeitada, propoñendo un itinerario para a súa aprobación e posta en marcha, se procede, na Asemblea da tarde.

  • Outras actividades de EQUO Galicia para o ano, buscando medrar e consolidar a nosa estrutura e marca.

HORA: 11h (prégase puntualidade)
LUGAR: A Nave de Vidán, Avenida Mestra Victoria Miguez, 44.
15706 Santiago de Compostela http://www.anavedevidan.com

No propio local hai posibilidade de xantar para as persoas que asistan tanto á xornada da mañá como á posterior Asemblea.

Trataremos de dispor de ‘streaming’ da Asemblea, posibilidade que confirmaremos co recordatorio da mesma uns días antes do 23 de xaneiro.

Este domingo, únete á Marcha Mundial polo Clima

Marchas e concentracións na Coruña, Ourense en Vigo para reclamar ás dirixentes do Cumio de París (COP21) medidas efectivas na loita contra o cambio climático.

EQUO Coruña organiza unha charla sobre o cambio climático tras a concentración da Coruña

Os líderes mundiais de 195 países reuniranse en París con motivo da vixésimo primeira Conferencia das Partes (COP21) auspiciada pola Convención Macro das Nacións Unidas sobre o Cambio Climático. Este cumio comezará o día 30 deste mes e rematará o 11 de decembro. O día anterior, domingo 29 de novembro, terá lugar a Marcha Mundial polo Clima coa que millóns de persoas no mundo queren esixirlle a estes líderes mundiais que cheguen a un acordo na loita contra o cambio climático.

A Coruña, Ourense en Vigo serán as cidades galegas que acollan actos deste tipo. En Ourense, a marcha organizada por Amigos da Terra arranca ás 19h do domingo na Praza Maior, e chegará á Ponte Romana. En Vigo, na Rúa de Sebastián Elcano haberá unha concentración, con manifesto e micro aberto, ás 16:30. O lugar elixido polas convocantes na Coruña é a Praza de María Pita, e aquí a concentración comezará ás 12.00 horas da mañá do domingo. As organizadoras da protesta coruñesa animan a todas as persoas que asistan á mesma a que leven abanos, para simbolizar o empeño das persoas por tomar accións individuais por reducir as emisións de dióxido de carbono. Despois da concentración, ás 13.00 horas, EQUO Coruña organizada unha charla sobre o cambio climático na que se conta co físico e divulgador científico Rubén Fernández (Xarpe Serpe) e a covoceira de EQUO A Coruña, Silvia Pinal. O acto terá lugar na Libraría Berbiriana, ao lado de María Pita (berbiriana, libros e grolos http://berbiriana.com, Rúa Santiago 7).

Estas son as convocatorias lanzadas na plataforma telemática Avaaz:

Dende EQUO Galicia valoramos moi positivamente as distintas iniciativas que se levarán a cabo este 29 de novembro en todo o país, e invitamos a todas as organizacións e persoas a que se acheguen ás mesmas para facerlles saber aos gobernantes mundiais que deben ser ambiciosos nesta loita, con altura de miras e deixando a un lado os intereses particulares de cada país, defendendo ás persoas e ao seu hábitat e non ás grandes corporacións, que presionan para seguir co ritmo actual de contaminación. Queremos lembrar que, de non reducirse inmediatamente o ritmo de emisións de CO2, as temperaturas subirán entre 3,7º e 4º graos a finais de século, e hai que ter en conta que unha suba de 2º xa ten consecuencias dramáticas para o planeta.

A nosa asemblea quere poñer de manifesto que a crise climática á que nos enfrontamos non é mais que unha parte dunha gran crise multidimensional que ten no seu centro o modelo produtivo no que nos vemos inmersos. O capitalismo xerou consecuencias que non entran nos libros contables das empresas e dos estados, como a destrución do medio, conflitos bélicos polo control de recursos enerxéticos ou as crecentes desigualdades sociais. Por todo isto, en EQUO pensamos que o modelo ten que cambiar e, mentres iso non sucede, demandamos que para 2050 o 100% das enerxías sexan renovables e que a Unión Europea defenda posicións máis valentes (a súa proposta de redución dun 40% é insuficiente). As gobernantes reunidas na COP21 teñen que chegar a acordos vinculantes que non poidan ser impugnados diante de tribunais como os propostos no TTIP e no CETA. Ademais, débese dar soporte financeiro aos países do Sur para a súa transición a un modelo sostible xa que son os que menos contribúen ao cambio climático pero os primeiros que notan as súas consecuencias.

Debuxo do noso planeta apostando polas enerxías verdes e o consumo responsable