Bici+Tren: unha aposta pola inter-modalidade no transporte

EQUO esixe que os trens da nova liña de alta velocidade en Galicia sigan a permitir o acceso das bicicletas

A posibilidade de subir a bici nos trens galegos diminuíu notablemente nos últimos anos

Ante a próxima posta en funcionamento da nova liña de alta velocidade de Galicia, EQUO Galicia esixe que os trens desta liña dispoñan do correspondente espazo para bicicletas e, polo tanto, sigan mantendo a posibilidade de acceso coas mesmas como ata agora.

En Galicia vimos sufrindo nos últimos anos un constante retroceso na posibilidade de subir bicis ao tren. Así sucedeu, por exemplo, no ano 2010, cando os trens que percorrían a liña A Coruña – Ferrol foron substituídos por outros que carecen de espazos habilitados para as bicicletas. Ata ese momento os trens que facían este servizo dispoñían desa posibilidade, e o cambio dos convois fixo que desde ese ano non se permita o acceso con bicicletas nesa liña.

Unha situación semellante produciuse en 2011 cando os trens «Avant» comezaron a percorrer a nova liña de alta velocidade A Coruña – Santiago – Ourense. Así, mentres este mesmo modelo de tren que circula na liña AVE Madrid – Valladolid si dispón de espazo para as bicicletas, o que percorre a liña galega non permite o acceso con bicicletas, aínda dispoñendo de espazo para levalas. No tren A Coruña – Ourense, este espazo non foi
habilitado ao non ser colocados os ganchos de suxeición.

A posibilidade de subir bicis ao tren, permitindo así a inter-modalidade entre distintos medios de transporte, favorece un transporte sostible e eficiente, e é unha práctica habitual nos ferrocarrís europeos. EQUO Galicia considera imprescindible que as usuarias poidan levar as súas bicicletas no novo tren que unirá as vilas da Coruña, Santiago de Compostela, Vilagarcía de Arousa, Pontevedra, Redondela e Vigo.

Imaxe duns ganchos de suxeición para bicicletas
Ganchos de suxeición para bicis que RENFE decide non incluír nos trens Avant de Galicia

 

Paremos o TTIP: novas accións de información e sensibilización

As Persoas e o Planeta antes que o Capital!

18A vigo

TTIP: siglas en inglés dese tratado de libre comercio que a Unión Europea e os Estados Unidos están a negociar ás nosas costas, de xeito absolutamente escandaloso, e que busca priorizar os beneficios das grandes corporacións sobre os nosos dereitos e o noso benestar.

Ante a ameaza do TTIP, a cidadanía organizada social e politicamente está a reaccionar con distintas mobilizacións para informar, sensibilizar e protestar ante este atropelo por parte de certos intereses que, desde logo, non son os da cidadanía.

Varias son as frontes nas que se está a loitar contra o TTIP, dando a coñecer que é e as súas consecuencias, así como intentando xerar estruturas de resposta social onde se aglutinen as forzas contra os TLC (Tratados de Libre Comercio). A campaña global «18A, Global Action Day»  trata de ser un nexo común no que concentrar e facer confluír as distintas mobilizacións o 18 de abril. Unha das organizacións que máis está a mover estas mobilizacións é ECOAR, aínda que non se pode tampouco obviar o gran traballo de información e denuncia feito por outras organizacións como ATTAC. Incorporamos ao final desta entrada o manifesto desta acción global. A principal manifetación en Galicia será en Vigo, e de momento é a única confirmada.

Mirando xa cara esa cita do 18A, en Galicia dan comezo hoxe, xoves 26 de marzo, as xornadas «Recuperar Soberanía, Desarmar o TTIP» cunha primeira charla en Vigo da man de Susan George, activista, escritora, científica socio-política e presidenta da Xunta do Transnational Institute. Estas xornadas, coordinadas por ECOAR e participadas por múltipes persoas e colectivos, constarán de varias sesións en distintos lugares de Galicia.

Cartel das xornadas Recuperar Soberanía, Desarmar o TTIP

A relación completa de relatorios destas xornadas é:

  • 26 marzo ás 19:30h, Susan George no Auditorio do Centro Municipal de Teis, Vigo.
  • 31 marzo ás 19h, Florent Marcellesiu e Tom Kucharz, videoconferencia que pode ser seguida na Biblioteca Pública Ánxel Casal de Santiago de Compostela, no Salón de Graos da Facultade de Socioloxía da Coruña e no Café de Catro a Catro de Vigo.
  • 4 abril ás 20h, Albano Dante Fachin no Salón de Actos do IES Santa Irene, Vigo.
  • 9 abril ás 19h, Ricardo G. Zaldívar no Salón de Actos da Facultade de Económicas de Santiago de Compostela
  • 13 abril ás 19h, Arcadi Oliveres na Aula Magna da Facultade de Socioloxía da Coruña.

Precisamente unha das persoas que intervén nestas xornadas é Florent Marcellesi, representante de EQUO no Parlamento Europeo, outra das frontes nas que o Partido Verde Europeo e outras organizacións políticas tratan de plantar cara ao TTIP. Florent está a facer un incansable labor neste eido, non só co seu traballo político senón tamén cun importante esforzo divulgador, do que presentamos a continuación unha escolma:

Ligazón á campaña contra o TTIP

Manifesto do Día de acción global – 18 de abril do 2015 (báixao en PDF!)

As Persoas e o Planeta antes que o Beneficio Corporativo

Chamamento de acción acción global para deter os Tratados de libre comercio e investimentos

Nós, organizacións da sociedade civil, sindicalistas, campesiñas e campesiños, xuventude, mulleres e homes activistas de movementos da Galiza xunto con outras de todas as partes do mundo, chamamos a un Día de acción global a realizarse o 18 de abril do 2015 co fin de parar os acordos de libre comercio e investimentos e promover unha economía que funcione para cada unha das persoas, e para o medio ambiente.

Ao longo das últimas décadas, as empresas transnacionais e os gobernos impulsaron tratados de libre comercio e de investimentos ás costas da cidadanía, vulnerando os nosos dereitos e os do medio ambiente.

Ao longo das últimas décadas, vimos loitando pola soberanía alimentaria, polos nosos bens comúns, pola xestión dos nosos recursos, pola defensa dos nosos empregos, os nosos territorios, as liberdades en internet, mentres esixiamos democracia. No camiño, crecemos como movemento, logramos que escoiten as nosas voces e logramos moitas vitorias.

Entre todas podemos parar os acordos que se están negociando ás nosas costas e traballar para revertir os impactos nocivos dos tratados pasados. Xuntas impulsamos as nosas alternativas que se fundamentan na primacía dos dereitos humanos e na defensa do Medio Ambiente por encima dos privilexios e beneficios das grandes empresas.

Facemos un chamamento á cidadanía viguesa e a todas as organizacións presentes na cidade, e de toda Galicia, a que se mobilicen o 18 de abril contra este tipo de tratados de libre comercio que pretenden facer máis efectivo o trasvase de riqueza cara as elites. Sumámonos cunha concentración en Vigo (cruce da rúa do Príncipe con Colón), ás 20h á diversidade de tácticas e accións solidarias que se preparan a redor de todo o planeta para contribuir a informar buscando a participación e mobilización da xente, rumbo a un novo modelo económico e de comercio que funcione para o beneficio de todas as persoas e o planeta, agora e no futuro.

 

Estándares abertos: por unha tecnoloxía ética #DFD2015

Estándares abertos como garantes da equidade nas comunicacións dixitais e no acceso á tecnoloxía

Hoxe 25 de marzo, o derradeiro mércores deste mes, celébrase o Día da Liberdade dos Documentos (Document Freedom Day, #DFD2015), que reivindica o emprego e potenciación de formatos e estándares abertos na creación de documentos electrónicos e en calquera comunicación dixital.

dfd2015

O uso de formatos privativos pechados nos nosos documentos dixitais cerna as nosas liberdades non só no que respecta á nosa soberanía e independencia tecnolóxica como suxeitos individuais ou como comunidade, ao obrigarnos a empregar ferramentas e tecnoloxías concretas baixo o control exclusivo de determinadas empresas, se non que atenta contra a equidade no acceso aos servizos públicos e na nosa interacción coa administración.

Na nosa entrada do ano pasado celebrando este día, #DFD2014, xa falabamos de que un acceso xusto e responsable ás tecnoloxías da información é fundamental na consecución do obxectivo de lograr unha sociedade máis xusta, libre e transparente. Esa afirmación é hoxe aínda máis pertinente, toda vez que a sombra das patentes do software volve percorrer a Unión Europea: Las patentes acechan al software (otra vez), un artigo sobre esta problemática no Diario Turing do xornal electrónico eldiario.es